Egilea

Leire Lekuona

Leire Lekuona Elizondo (Getxo, Euskal Herria, 1976ko abuztuaren 19a) ipuingilea eta eleberri historikoen egilea da. Bi anai-arrebetatik bigarrena, beti nahi izan zuen marraztu eta margotu bere aitak egiten zuen bezala. Aita Bermeokoa zen eta lanbidez delineatzailea, eta denbora librean paisaiak margotzen aritzen zen. Aita izan ohi zen, bera txikia zela, sorgin eta gainerako pertsonaiei buruzko ipuinak asmatzen zituena, euskal kostaldean zehar familiarteko ibilaldiak alaitzeko asmoz.

Amagandik eta amaren familiarengandik jaso zuen irakurzaletasuna. Ez bakarrik nobelak, baita dibulgazio edo saiakera liburuak ere. Oraindik gogoan du, txikitan, amamaren liburutegian giltzapetzea gustatzen zitzaiola, mitologia unibertsalari buruzko bere entziklopedia edo euskaldunen historiari buruzko liburu-bilduma begiratzeko, beste hainbat liburu eta bildumen artean.

Irakurzaletasuna laster garatu zuen, batez ere hamar urterekin El Hobbit irakurri ondoren, eta hamaika urterekin J.R.R.Tolkien-en Eraztunen Jauna trilogia. Hortik aurrera, fantasiazko liburuak bere gelan pilatuz joan ziren, bestelako irakurketaz zaletzen hasi zen arte: mitologiari buruzko dibulgaziozko liburuak, Joseph Campbell-en El poder del mito, adibidez; abenturazko liburuak eta historikoak, Jean M. Auel-en El clan del oso cavernario edo Yon Etxaideren Gorrotoa Lege, adibidez; edo gehien markatu zuena, Francisco Navarro Villosladaren Amaia y los vascos en el siglo VIII.

Haurtzaro eta gaztaroa bere jaioterrian eman zuen, uda gehienak Soriako pinudien artean, eta bisita txikiak aitaren herrira, Bermeora, historikoki arrantzale herria izan den herrira. Batxilergoa amaituta, Arte Ederretan lizentziatu zen Euskal Herriko Unibertsitatean, eta diseinatzaile grafiko gisa lan egin zuen Bilboko zenbait diseinu- eta publizitate-agentziatan, zenbait urtez freelance gisa egin aurretik. Gaur egun, unibertsitatean bertan egiten du lan, eta Argitalpen Zerbitzuko zuzendari teknikoa da.

Berrogeita bi urte bete arte ez zuen erabaki idazten hasiko zela, eta Gaztelugatxera egindako txango batean pentsatu zuen Xixiliren istorioa konta zezakeela, Bermeoko laminarena, haurtzaroan etxean entzuna zuenari buruz. Eguzkilore Liburuak izeneko argitaletxe txiki bat ireki berria zuen lagun batek animaturik, 2019an ipuin bat idazten hasi zen bere ama-hizkuntzan, euskaran, Xixili. Hegatsa galdu nuenekoa izenburupean. Edizio zainduarekin eta sentsibilitate bereziarekin, egileak euskal mitologian eta mitologia unibertsalean oinarritutako kontakizun klasiko bat birsortzen du, denbora-ingurune zehaztugabe batean eta fantastikoaren eta errealaren arteko espazio batean.

Geroxeago etorri zen Bizirik dirauena (2022) nobela laburraren argitalpena, benetako gertaeretan oinarritua. Adin oso ezberdineko bi gizonen arteko adiskidetasuna da protagonista liburuan, haietako baten bizi-esperientzia zaila azaleratzen doan bitartean, Bigarren Mundu Gerran paraxutista gisa parte hartu zuenetik aurrera.

Gaur egun, Nafarroan girotutako eleberri historiko baten lanketan murgilduta dago Leire, agian 2026an argitaratu ahal izango dena.